ໃນ​ຕ​ອນ​ເຊົ້າ ຂອງ​ວັນ​ທີ 30 ກັນ​ຍາ 2020  ທີ່​ຫ້ອງ​ສະ​ໂມ​ສອນ ຄະ​ນະ​ກວດ​ກາ​ສູນ​ກາງ​ພັກ ແລະ ອົງ​ການກວດ​ກາ​ລັດ​ຖະ​ບານ ໄດ້​ມີ​ການ​ຈັດກອງປະຊຸມເຜີຍ​ແຜ່ ແລະ ສຳ​ມະ​ນາ ໃຫ້​ຄວາມ​ຮູ້​ກ່ຽວ​ກັັບ​ການຫັນເປັນທັນສະໄໝ ແລະ ລະ​ບົບ​ລັດຖະບານ​​ທັນ​ສະ​ໄໝ (Digital Government). ໂດຍການເປັນປະທານຮ່ວມຂອງ ທ່ານ ສີ​ໃນ ມຽງ​ລາ​ວັນ ຮອງ​ປະ​ທານ​ຄະ​ນະ​ກວດ​ກາ​ສູນ​ກາງ​ພັກ ແລະ ອົງ​ການກວ​ດ​ກາ​ລັດ​ຖະ​ບານ ແລະ ທ່ານ ປະລິນຍາເອກ ທະວີສັກ ມະໂນທັມ ຫົວໜ້າສູນບໍລິຫານລັດດ້ວຍເອເລັກໂຕຣນິກ, ກະຊວງໄປສະນີ ໂທລະຄົມມະນາຄົມ ແລະ ການສື່ສານ. ໂດຍມີບັນດາຄະນະປະທານ, ຄະນະກົມ/ທຽບເທົ່າ, ຄະນະພະແນກ ແລະ ວິຊາການ ພາຍໃນຄະ​ນະ​ກວດ​ກາ​ສູນ​ກາງ​ພັກ ແລະ ອົງ​ການກວດ​ກາ​ລັດ​ຖະ​ບານ ເຂົ້າ​ຮ່ວມ​ທັງ​ຫມົດ ຈຳ​ນວນ 188 ທ່ານ, ຍິງ 71 ທ່ານ.

      ໃນການຈັດກອງປະຊຸມສຳມະນາຄັ້ງນີ້ ທ່ານ ປະລິນຍາເອກ ທະວີສັກ ມະໂນທັມ ຫົວໜ້າສູນບໍລິຫານລັດດ້ວຍເອເລັກໂຕຣນິກ ພ້ອມ​ດ້ວຍທີມ​ງານ​ຄະ​ນ​ະ ໄດ້​ນຳ​ສະ​ເໜີ ໃຫ້​ເຫັນ​ຄວາມ​ສຳ​ຄັນ​ໃນ​ການ​ເຊື່ອມ​ໂຍງ​ເຕັກ​ໂນ​ໂລ​ຊີ​ດິ​ຈີ​ຕອນ ເຂົ້າ​ໃນ​ການ​ບໍ​ລິ​ຫານ​ວຽກ​ງານ​ຂອງພັກ ແລະ ລັດຖະບານ, ເຊິ່ງ​ການ​ຫັນ​ປ່ຽນ​ເປັນ​ທັນ​ສະ​ໄໝ​ດ້ວຍ​ລະ​ບົບ​ດີ​ຈີ​ຕອ​ນ(Digital Transformation), ການ​ນຳ​ໃຊ້​ລະ​ບົບ​ຫ້ອງ​ການ​ທັນ​ສະ​ໄໝ (e-office), ລະ​ບົບ​ໂປ​ຣ​ແກ​ຣມ​ສື່​ສານ​ພາກ​ລັດ (G-Chats), ລະ​ບົບ​ແຊ ແລະ ໃຊ້ຂໍ້​ມູນ​ຮ່ວມ​ກັນ​ຂອງ​ພາກ​ລັດ (G-Share ແລະ G-Drive), ລະບົບກອງປະຊຸມທາງໄກ (Video Conference) ລົບຈົດໝາຍເອເລັກໂຕຣນິກ (e-Mail), ລະບົບເວັບໄຊລວມຂອງພາກລັດ (G-Web Platform) ແລະ ການບໍລິການອື່ນໆ ຂອງສູນບໍລິຫານລັດດ້ວຍເອເລັກໂຕຣນິກ ເຊິ່ງ​ທັງ​ຫມົດ​ແມ່ນ​ແນ​ໃສ່​ໃຫ້ແຕ່ລະພາກຫັນເປັນທັນສະໄໝເທື່ອລະກ້າວ​ ເຊິ່ງລະບົບການເຮັດ​ວຽກ​ຮ່ວມ​ກັນ​ບໍ່​ວ່າ​ຈະ​ເປັນ​ການ​ຈັດ​ການ​ເອ​ກະ​ສານ, ການ​ເກັບ​ຮັກ​ສາ, ການ​ນຳ​ໃຊ້ , ການ​ກະ​ຈາຍ​ຂໍ້​ມູນ, ການຕິດ​ຕໍ່​ສື່​ສານ ລະ​ຫວ່າງ​ຜູ້​ຮ່ວມ​ງານ​ແຕ່​ລະ​ຄົນ​ໃຫ້​ມີ​ຄວາມ​ສະ​ດວກ, ວ່ອງ​ໄວ ແລະ ມີຄຸນນະພາບ​ຫຼາຍ​ຂື້ນ.

    ກອງປະຊຸມໄດ້ດໍາເນີນໄປດ້ວຍບັນຍາກາດ​ຟົດ​ຟື້ນ, ໄດ້ມີການຕັ້ງຄຳຖາມ-ຕອບ ແລກປ່ຽນຄຳຄິດເຫັນ ປຶກສາຫາລື ບັນຫາຕ່າງໆ ທີ່ກ່ຽວຂ້ອງເຖິງການຄຸ້ມຄອງ, ການນໍາໃຊ້ ແລະ ພັດທະນາ ລະບົບທັນສະໄໝທີ່ໃຊ້ດີຈິຕອນ ເຂົ້າໃນວຽກງານໃຫ້ມີຄວາມປອດໄພ ແລະ ມີປະສິດຕິພາບ.

   ໃນຕອນທ້າຍ, ທ່ານ ປະລິນຍາເອກ ທະວີສັກ ມະໂນທັມ ໄດ້​ສະ​ແດງ​ຄວາມ​ເຫັນ​ກ່ຽວ​ກັບ ການ​ພັດ​ທະ​ນາ​ໂຄງ​ລ່າງ​ພື້ນ​ຖານ​ການ​ເຊື່ອມ​ຕໍ່​ເຄື່ອ​ຂ່າຍ​ພາຍ​ໃນ​ພາກ​ລັດ ເພື່ອ​ໃຫ້ ສາມາດເຊື່ອມໂຍງຫາກັນໄດ້ ເພື່ອເປັນເງື່ອນໄຂອຳນວຍຄວາມສະດວກໃນການຕິດຕໍ່-ພົວພັນວຽກງານ, ແລກປ່ຽນຂໍ້ມູນເຊິ່ງກັນແລະກັນ ແລະ ສາມາດເຂົ້າເຖິງການບໍລິການຕ່າງໆ ຂອງລະບົບບໍລິຫານລັດໄດ້ຢ່າງສະດວກ, ວ່ອງໄວ ແລະ ມີຄວາມປອດໄພ ແລະ ຈາກນັ້ນ ທ່ານ ສີ​ໃນ ມຽງ​ລາ​ວັນ ກໍ່ໃຫ້ຄໍາ​ເຫັນໂດຍຈະນໍາເອົາເນື້ອໃນຈິດໃຈ ແລະ ບົດຮຽນຮຽນຈາກກອງປະຊຸມນີ້ ໄປຈັດຕັ້ງປະຕິໃຫ້ມີໝາກຜົນ ແລະ ມີຄຸນພະພາບດີຂື້ນເທື່ອລະກ້າວ.