ໃນ​ຕ​ອນ​ເຊົ້າ ຂອງ​ວັນ​ທີ 07 ຕຸລາ 2020  ທີ່​ຫ້ອງ​ປະຊຸມສະພາທິດສະດີສູນກາງພັກ ໄດ້​ມີ​ການ​ຈັດກອງປະຊຸມເຜີຍ​ແຜ່ ແລະ ສຳ​ມະ​ນາ​ກ່ຽວ​ກັັບ​ການຫັນເປັນທັນສະໄໝ ແລະ ລະ​ບົບ​ລັດຖະບານ​​ທັນ​ສະ​ໄໝ (Digital Government). ໂດຍການເປັນປະທານຮ່ວມຂອງ ທ່ານ ນາມ ວິຍະເກດ ແລະ ທ່ານ ສອນທະນູ ທໍາມະວົງ ກໍາມະການສູນກາງພັກ, ຮອງປະທານ ສະພາທິດສະດີສູນກາງພັກ, ແລະ ນໍາສະເໜີໂດຍ ທ່ານ ປະລິນຍາເອກ ທະວີສັກ ມະໂນທັມ ຫົວໜ້າສູນບໍລິຫານລັດດ້ວຍເອເລັກໂຕຣນິກ, ກະຊວງໄປສະນີ ໂທລະຄົມມະນາຄົມ ແລະ ການສື່ສານ ພ້ອມດ້ວຍທີມງານ ແລະ ມີບັນດາຄະນະປະທານ, ສະມາຊິກສະພາ ແລະ ພະນັກງານຂອງ ສະພາທິດສະດີສູນກາງພັກເຂົ້າຮ່ວມ ຈຳ​ນວນ 25 ທ່ານ, ຍິງ 02 ທ່ານ.

ໃນການຈັດກອງປະຊຸມສຳມະນາຄັ້ງນີ້ ທ່ານ ປະລິນຍາເອກ ທະວີສັກ ມະໂນທັມ ຫົວໜ້າສູນບໍລິຫານລັດດ້ວຍເອເລັກໂຕຣນິກ ພ້ອມ​ດ້ວຍທີມ​ງານ​ຄະ​ນ​ະ ໄດ້​ນຳ​ສະ​ເໜີ ສະພາບລວມ ​ການ​ຫັນ​ປ່ຽນ​ເປັນ​ທັນ​ສະ​ໄໝ​ດ້ວຍ​ລະ​ບົບ​ດີ​ຈີ​ຕອ​ນ (Digital Transformation) ໃນໂລກ ແລະ ຂອງ ສປປ ລາວ, ຈາກນັ້ນ ທ່ານ ຄໍາຜາຍ ອິນທະຣາ ຫົວໜ້າພະແນກ ໂປຣແກຣມ ແລະ ຂໍ້ມູນຂ່າວສານ ແລະ ຄະນະກໍ່ໄດ້ນໍາສະເໜີ ​ລະ​ບົບ​ຫ້ອງ​ການ​ທັນ​ສະ​ໄໝ (e-office) ແລະ ລະບົບການບໍລິຫານ/ບໍລິການພາກລັດເຊັ່ນ: ລະ​ບົບ​ໂປ​ຣ​ແກ​ຣມ​ສື່​ສານ​ພາກ​ລັດ (G-Chat), ລະ​ບົບ​ແຊ ແລະ ໃຊ້ຂໍ້​ມູນ​ຮ່ວມ​ກັນ​ຂອງ​ພາກ​ລັດ (G-Share ແລະ G-Drive), ລະບົບກອງປະຊຸມທາງໄກ (Video Conference) ລົບຈົດໝາຍເອເລັກໂຕຣນິກ (e-Mail), ລະບົບເວັບໄຊພາກລັດ (G-Web Platform) ແລະ ການບໍລິການອື່ນໆ ເພື່ອນຳໃຊ້ໃນການເຊື່ອມໂຍງເຮັດ​ວຽກ​ຮ່ວມ​ກັນ​ຂອງລະບົບຕ່າງໆເຊັ່ນ:​​ ການ​ຈັດ​ການ​ເອ​ກະ​ສານ, ການ​ເກັບ​ຮັກ​ສາ, ການ​ນຳ​ໃຊ້ , ການ​ກະ​ຈາຍ​ຂໍ້​ມູນ, ການຕິດ​ຕໍ່​ສື່​ສານ ລະ​ຫວ່າງ​ຜູ້​ຮ່ວມ​ງານ​ແຕ່​ລະ​ຄົນ​ໃຫ້​ມີ​ຄວາມ​ສະ​ດວກ, ວ່ອງ​ໄວ ແລະ ມີຄຸນນະພາບ​ຫຼາຍ​ຂື້ນ ເຊິ່ງ​ທັງ​ຫມົດ​ແມ່ນ​ແນ​ໃສ່​ໃຫ້ແຕ່ລະພາກຫັນເປັນທັນສະໄໝເທື່ອລະກ້າວ​

ກອງປະຊຸມໄດ້ດໍາເນີນໄປດ້ວຍບັນຍາກາດຟົດ​ຟື້ນ ໄດ້ມີການຕັ້ງຄຳຖາມ-ຕອບ ແລກປ່ຽນຄຳຄິດເຫັນ ປຶກສາຫາລື ບັນຫາຕ່າງໆ ທີ່ກ່ຽວຂ້ອງເຖິງການຄຸ້ມຄອງ, ການນໍາໃຊ້ ແລະ ພັດທະນາ ລະບົບທັນສະໄໝ ດ້ານດີຈິຕອນ ເຂົ້າໃນວຽກງານໃຫ້ມີຄວາມປອດໄພ ແລະ ມີປະສິດທິພາບ.

ໃນຕອນທ້າຍ, ທ່ານ ປະລິນຍາເອກ ທະວີສັກ ມະໂນທັມ ໄດ້​ສະ​ແດງ​ຄວາມ​ເຫັນ​ກ່ຽວ​ກັບ ການ​ພັດ​ທະ​ນາ​ໂຄງ​ລ່າງ​ພື້ນ​ຖານ​ການ​ເຊື່ອມ​ຕໍ່​ເຄື່ອ​ຂ່າຍ​ພາຍ​ໃນ​ພາກ​ລັດ ແລະ ການເຊື່ອມໂຍງຂໍ້ມູນຂອງພາກລັດ (Digital Data Government) ທຸກຂະແໜງການ ໃຫ້ລວມສູນ ແລະ ສາມາດນຳໃຊ້ຮ່ວມກັນໄດ້ ເພື່ອເປັນເງື່ອນໄຂອຳນວຍຄວາມສະດວກໃນການຕິດຕໍ່-ພົວພັນວຽກງານ, ແລກປ່ຽນຂໍ້ມູນເຊິ່ງກັນແລະກັນ ແລະ ສາມາດເຂົ້າເຖິງການບໍລິການຕ່າງໆ ຂອງລະບົບບໍລິຫານລັດໄດ້ຢ່າງສະດວກ, ວ່ອງໄວ ແລະ ມີຄວາມປອດໄພ, ແລະ ຈາກນັ້ນ ທ່ານ ນາມ ວິຍາເກດ ກໍ່ໃຫ້ຄໍາ​ເຫັນໂດຍຈະນໍາເອົາເນື້ອໃນຈິດໃຈ ແລະ ແຜນການຫັນເປັນທັນສະໄໝ ຈາກກອງປະຊຸມນີ້ ໄປຄົ້ນຄວ້າ ສະເໜີລັດຖະບານ ເພື່ອຈັດຕັ້ງປະຕິບັດໃຫ້ມີໝາກຜົນ ແລະ ມີຄຸນພະພາບດີຂື້ນເທື່ອລະກ້າວ.