ໃນວັນທີ 03-04 ກັນຍາ 2024 ຮອງຫົວໜ້າສູນບໍລິຫານລັດດິຈິຕອນ (ສລດ) ກະຊວງ ເຕັກໂນໂລຊີ ແລະ ການສື່ສານ ພ້ອມດ້ວຍຄະນະ, ໄດ້ເຂົ້າຮ່ວມ ກອງປະຊຸມ OECD ດ້ານ ນະວັດຕະກໍາ, ດິຈິຕອນ ແລະ ການເຊື່ອມໂຍງ ຂໍ້ມູນເປີດພາກລັດ ໃນຂົງເຂດອາຊີຕະເວັນອອກສຽງໃຕ້ (INDIGO Network 2024) ທີ່ ປະເທດ ສ. ເກົາຫຼີໃຕ້ໂດຍມີຕາງໜ້າຜູ້ເຂົ້າຮ່ວມຈາກບັນດາປະເທດສະມາຊິກ OECD ແລະ ປະເທດພັນທະມິດ

ຈຸດປະສົງຂອງກອງປະຊຸມຄັ້ງນີ້ ກໍແມ່ນເປັນເວທີໃນການແລກປ່ຽນຂໍ້ມູນ ທາງດ້ານ ນະວັດຕະກໍາ, ເຕັກໂນໂລຊີທີີ່ທັນສະໄໝ ແລະ ນຳໃຊ້ຂໍ້ມູນເປີດ ເພື່ອເປັນຕົວຊ່ວຍໃນການຂັບເຄື່ອນວຽກງານການຫັນເປັນລັດດິຈິຕອນ, ພ້ອມທັງ ຍັງແລກປ່ຽນ ວຽກງານດ້ານນະໂຍບາຍ, ກົດລະບຽບ ແລະ ກົນໄກແລກປ່ຽນຄວາມຮູ້ລະຫວ່າງ ສະມາຊິກ OECD ແລະ ປະເທດພັນທະມິດ.  ສູນບໍລິຫານລັດດິຈິຕອນ ຈະໄດ້ເຂົ້າຮ່ວມ ແລະ ນໍາສະເໜີ ການພັດທະນາດ້ານດິຈິຕອນ ໃນການເຊື່ອມໂຍງຂໍ້ມູນພາກລັດ ຂອງ ສປປ ລາວ

ສປປ ລາວ ໃນນາມປະເທດ ທີ່ປະກອບຂໍ້ມູນດ້ານການພັດທະນາ ລັດດິຈິຕອນ ໃນບົດລາຍງານ 2024 ຂອງກຸ່ມປະເທດຕາເວັນອອກສຽງໃຕ້, ທ່ານ ນາງ ວັນນະພາ ພົມມະທັນສີ ຮອງຫົວໜ້າສູນບໍລິຫານລັດດິຈິຕອນ ກໍໄດ້ ລາຍງານ ແລະ ນໍາສະເໜີ ສະພາບການພັດທະນາ ແລະ ແຜນການຕໍ່ໜ້າໃນການຄຸ້ມຄອງຂໍ້ມູນເປີດພາກລັດ, ການນໍາໃຊ້ເຕັກໂນໂລຊີດິຈິຕອນ ແລະ ການນໍາໃຊ້ AI ໃນການຄຸ້ມຄອງບໍລິຫານລັດ. ນອກນັ້ນ, ຈະຊ່ວຍໃຫ້ສາມາດນໍາເອົາບົດຮຽນເຫຼົ່ານັ້ນ ມານໍາໃຊ້ ແລະ ພັດທະນາວຽກງານການຫັນເປັນລັດດິຈິຕອນໃນ ສປປ ລາວ

ກອງປະຊຸມດັ່ງກ່າວແມ່ນມີຄວາມສໍາຄັນ ຕໍ່ວຽກງານ ການຫັນເປັນລັດຖະບານດິຈິຕອນ, ເຊິ່ງເປັນໜຶ່ງໃນເສົາຄ້ໍາໃນການຫັນເປັນທັນສະໄໝຂອງ ສປປ ລາວ. ປັດຈຸບັນ, ເຕັກໂນໂລຊີທີ່ທັນສະໄໝ ເປັນເຄື່ອງມື ທີ່ມີຄວາມສຳຄັນ ໃນການຊ່ວຍເພີ່ມປະສິດທິພາບ ແລະ ຍົກສູງຄຸນນະພາບການຫັນເປັນທັນສະໄໝ ພ້ອມດຽວກັນນັ້ນ.  ກອງປະຊຸມນີ້ ຈະເປັນ ອີກໜຶ່ງ ເວທີ  ທີ່ມີຄວາມສຳຄັນ ຕໍ່ການແລກປ່ຽນ ແລະ ຖອດຖອນບົດຮຽນອັນສໍາຄັນກັບບັນດາປະເທດສະມາຊິກ OECD ແລະ ປະເທດພັນທະມິດ ທ້າງດ້ານ ນະໂຍບາຍ ແລະ ກົນໄກ ການພັດທະນາວຽກງານ ການຫັນເປັນລັດດິຈິຕອນ ທາງ OECD ຈະສືບຕໍ່ເຮັດວຽກກັບບັນດາປະເທດ ໃນພາກພື້ນ ແລະ ສປປ ລາວ ເພື່ອສ້າງຄວາມອາດສາມາດ ແລະ ສ້າງຄວາມເຂັ້ມແຂງດ້ານດິຈິຕອນ ໃຫ້ ບຸກຄະລາກອນພາກລັດ