ໃນຕອນເຊົ້າຂອງວັນທີ 24 ກັນຍາ 2025 ທີ່ ຫ້ອງປະຊຸມໃຫຍ່ຊັ້ນ 4 ຕຶກ ຄະນະໂຄສະນາອົບຮົມສູນກາງພັກ, ໄດ້ຈັດກອງປະຊຸມສະຫຼຸບຜົນການຈັດຕັ້ງປະຕິບັດວຽກງານການຫັນເປັນດິຈິຕອນພາຍໃຕ້ບົດບັນທຶກຄວາມເຂົ້າໃຈ (MOU) ລະຫວ່າງ ຄະນະຫັນເປັນດິຈິຕອນ, ກະຊວງເຕັກໂນໂລຊີ ແລະ ການສື່ສານ ແລະ ກົມຂໍ້ມູນຂ່າວສານ ແລະ ຝຶກອົບຮົມ, ຄະນະໂຄສະນາອົບຮົມສູນກາງພັກ ໃຫ້ກຽດເປັນປະທານຮ່ວມ ໂດຍ ທ່ານ ປອ ທະວີສັກ ມະໂນທັມ,​ ຫົວໜ້າສູນບໍລິຫານລັດດິຈິຕອນ,​ ກຕສ ​ແລະ ທ່ານ ວັນຕຸລາ ຣັກນຸດ ຫົວໜ້າກົມ ຂໍ້ມູນຂ່າວສານ ແລະ ຝຶກອົບຮົມ,​ ຄະນະໂຄສະນາອົບຮົມສູນກາງພັກ, ຊື່ງມີຜູ້ຕາງໜ້າຂອງບັນດາຫ້ອງການ, ກົມ, ສະຖາບັນ,​ ຕາງໜ້າບັນດາອະນຸກຳມະການຫັນເປັນດິຈິຕອນ ຂອງທັງສອງພາກສ່ວນເຂົ້າຮ່ວມທັງໝົດ ຈຳນວນ 14 ທ່ານ, ຍິງ 04 ທ່ານ.

ຈຸດປະສົງຂອງກອງປະຊຸມໃນຄັ້ງນີ້ແມ່ນ ເພື່ອສະຫຼຸບຜົນສຳເລັດຂອງການຈັດຕັ້ງປະຕິບັດວຽກງານການຫັນເປັນດິຈິຕອນພາຍໃຕ້ຂອບການຮ່ວມມືໃນ MOU, ແລກປ່ຽນບົດຮຽນຜົນສໍາເລັດ, ຂໍ້ສະດວກຂໍ້ຫຍຸ້ງຍາກ, ສິ່ງທ້າທາຍ ແລະ ແຜນການຮ່ວມມືໃນຕໍ່ໜ້າ.​

ໃນກອງປະຊຸມ, ຕາງໜ້າ ຄະນະຫັນເປັນດິຈິຕອນ ກະຊວງເຕັກໂນໂລຊີ ແລະ ການສື່ສານ ໄດ້ລາຍງານຜົນສໍາເລັດໃນການສະໜອງອຸປະກອບຄອມພິວເຕີ 5ຊຸດ, ສະໜອງລະບົບບໍລິຫານລັດ ເຊັ່ນ e-Office, Email, G-Web, G-Chat, G-Share/G-Drive, ລະບົບກອງປະຊຸມທາງໄກ ແລະ ອື່ນໆ, ພ້ອມນັ້ນ ໄດ້ລາຍງານສະພາບການພັດທະນາການອອກແບບລະບົບພື້ນຖານໂຄງລ່າງ ແລະ ການຄຸ້ມຄອງລະບົບເຄືອຂ່າຍພາຍໃນ ຄອສພ,​ ວຽກງານການພັດທະນາລະບົບຫ້ອງສະໝຸດຂອງ ຄອສພ ຫັນເປັນທັນສະໄໝ, ສຳເລັດການຝຶກອົບຮົມບັນດາລະບົບບໍລິຫານພາກລັດ,​ ສຳເລັດການຈັດກອງປະຊຸມສຳມະນາຄວາມຮູ້ພື້ນຖານການຫັນເປັນດິຈິຕອນ ແລະ ກິດຈະກໍາອື່ນໆທີ່ປິ່ນອ້ອມພາຍໃຕ້ຂອບການຮ່ວມມືຂອງສອງພາກສ່ວນ.

ທັງສອງຝ່າຍໄດ້ມີການປະກອບຄໍາຄິດເຫັນຢ່າງກົງໄປກົງມາ ພ້ອມກັນຕີລາຄາຄືນບັນດາຜົນສຳເລັດຂອງໜ້າວຽກທີ່ໄດ້ດຳເນິນການຮ່ວມກັນ. ໃນນີ້ກົມຂໍ້ມູນຂ່າວສານ ແລະ ຝຶກອົບຮົມ, ຄອສພ ໃນນາມເປັນຄູ່ຮ່ວມມືໃນການຈັດຕັ້ງປະຕິບັດຂອບການຮ່ວມມື MOU ກໍ່ໄດ້ ສະເໜີໃຫ້ກະຊວງ ຕສ ຊ່ວຍລົງເລິກບາງກິດຈະກຳເພື່ມຕື່ມດັ່ງນີ້: ຈັດຝຶກອົບຮົມບັນດາລະບົບບໍລິຫານລັດ,​ ຊ່ວຍປັບປຸງໂຄງສ້າງການຈໍລະຈອນເອກະສານເພື່ອຮັບປະກັນບັນດາສະຖິຕິຂໍ້ມູນຂອງວຽກງານໂຄສະນາອົບຮົມໃຫ້ສາມາດເຊື່ອມໂຍງກັນໄດ້ລະຫວ່າງສູນກາງ ລົງຮອດທ້ອງຖິ່ນ ຕາມເເຜນຄວາມຕ້ອງການຂອງ ຄອສພ,​​ ສະເໜີ ກະຊວງ ຕສ ຊ່ວຍລົງຊຸກຍູ້ໃຫ້ຄໍາປືກສາດ້ານວິຊາການຕື່ມໃນການປັບປຸງຄຸ້ມຄອງລະບົບເຄືອຂ່າຍພາຍໃນ ຄອສພ, ປັບປຸງຫ້ອງສະໝຸດແບບດິຈິຕອນ ຂອງ ຄອສພ ແລະ ອື່ນໆ.​

ໃນກອງປະຊຸມຄັ້ງນີ້, ທັງສອງຝ່າຍ ຍັງໄດ້ປືກສາຫາລືເນັ້ນໃສ່ຂອບການຮ່ວມມືຕໍ່ໜ້າ ຄື: ຫັນວຽກງານຫ້ອງການຂອງ ຄອສພ ເປັນດິຈິຕອນ ໂດຍນຳໃຊ້ບັນດາລະບົບບໍລິຫານລັດຂອງກະຊວງ ຕສ ເຊັ່ນ ລະບົບ e-Office, Email, G-Chat, G-Share/G-Drive ແລະ ລະບົບອື່ນໆ. ​ອອກແບບ ແລະ ສ້າງລະບົບເຄືອຂ່າຍພາຍໃນຂອງ ຄອສພ, ຫັນວຽກຫ້ອງສະໝຸດ ຄອສພ ເປັນດີຈິຕອນ,​ ຈັດກອງປະຊຸມ, ຈັດຝຶກອົບຮົມ, ເຜີຍເເຜ່ເອກະສານ ແລະ ນໍາໃຊ້ລະບົບ AI ເຂົ້າມາມີສ່ວນຮ່ວມໃນການປະຕິບັດວຽກງານ.​ ທັງໝົດນັ້ນທັງສອງພາກສ່ວນຈະໄດ້ມີການແຕ່ງຕັ້ງຄະນະສະເພາະກິດເລັ່ງດ່ວນໃນການດຳເນິນການຮ່ວມກັນຕື່ມອິກ.

ກອງປະຊຸມໄດ້ປິດລົງດ້ວຍຜົນສໍາເລັດຢ່າງຈົບງາມໃນເວລາ 12:00 ໂມງ ຂອງວັນດຽວກັນ.