ໃນລະຫວ່າງວັນທີ 27 ກໍລະກົດ 2026 ຫາ 07 ສິງຫາ 2026, ໄດ້ມີການຈັດຝຶກອົບຮົມໃນຫົວຂໍ້ "ການພັດທະນາເວັບໄຊ" ທີ່ ສະຖາບັນເຕັກໂນໂລຊີ ແລະ ການສື່ສານ, ໂດຍການໃຫ້ກຽດເປັນປະທານຂອງ ທ່ານ ນາງ ວັນນະພາ ພົມມະທັນສີ, ຮອງຫົວໜ້າສູນບໍລິຫານລັດດິຈິຕອນ, ກະຊວງ ເຕັກໂນໂລຊີ ແລະ ການສື່ສານ, ພ້ອມທັງໄດ້ຮັບກຽດຈາກອາຈານສອນຈາກ ສ. ເກົາຫຼີ ທີ່ປະຈໍາສູນ Korea-ASEAN Digital Academy (KADA) ປະຈໍາລາວ ມາເປັນຜູ້ຖ່າຍທອດຄວາມຮູ້ໃນຄັ້ງນີ້ ແລະ ມີຜູ້ຕາງໜ້າເຂົ້າຮ່ວມຈາກ ບັນດາກົມ, ສູນ, ສະຖາບັນທຽບເທົ່າ ພາຍໃນ ກະຊວງ ຕສ ລວມທັງໝົດຈຳນວນ 30 ທ່ານ.  

ການຝຶກອົບຮົມໃນຄັ້ງນີ້,  ເປັນໜຶ່ງໃນແຜນກິດຈະກຳທີ່ຜັນຂະຫຍາຍ ການຮ່ວມມືລະຫວ່າງ ສູນບໍລິຫານລັດດິຈິຕອນ, ກະຊວງເຕັກໂນໂລຊີ ແລະ ການສື່ສານ ກັບ ອົງການ KWISA ສໍາລັບເນື້ອໃນຫຼັກຂອງການຝຶກອົບຮົມໃນຄັ້ງນີ້ແມ່ນເນັ້ນໃສ່ການພັດທະນາເວັບໄຊແບບ Full Stack ເຊິ່ງກວມເອົາທັງດ້ານ Front End ແລະ Back End, ໂດຍມີເປົ້າ  ໝາຍເພື່ອໃຫ້ຜູ້ເຂົ້າຮ່ວມສາມາດນໍາຄວາມຮູ້ ແລະ ທັກສະທີ່ໄດ້ຮັບໄປປະຍຸກໃຊ້ເຂົ້າໃນວຽກງານຕົວຈິງໄດ້ຢ່າງມີປະສິດທິພາບ.

ໃນໂອກາດນີ້, ທ່ານນາງ ວັນນະພາ ພົມມະທັນສີ ຮອງສູນບໍລິຫານລັດດິຈິຕອນ, ກະຊວງ ຕສ ໄດ້ມີຄໍາເຫັນ ຕໍ່ການຈັດຝຶກອົບຮົມໃນຄັ້ງນີ້ ແມ່ນເປັນໜຶ່ງໃນກິດຈະກໍາ ເພື່ອຜັນຂະຫຍາຍບົດບັນທຶກດັ່ງກ່າວ ແລະ ມີຈຸດປະສົງ ເພື່ອ ແລກປ່ຽນບົດຮຽນ, ສ້າງຄວາມອາດສາມາດ  ຂອງພະນັກງານ-ລັດຖະກອນ ພາຍໃນກະຊວງ ແລະ ໄດ້ເນັ້ນໜັກເຖິງຄວາມສໍາຄັນຂອງການພັດທະນາທັກສະບຸກຄະລາກອນພາຍໃນກະຊວງ ໃຫ້ສາມາດກ້າວທັນກັບສະພາບການພັດທະນາທາງດ້ານເຕັກໂນໂລຊີໃນປັດຈຸບັນ.

ນອກຈາກນັ້ນ, ການຝຶກອົບຮົມຄັ້ງນີ້ແມ່ນເປັນການເປີດໂອກາດໃຫ້ກັບນັກສຳມະນາກອນມີການສົນທະນາ, ແລກປ່ຽນຂໍ້ມູນ, ຊື່ງການສົນທະນາແມ່ນມີຄວາມຟົດຟື້ນ ແລະ ມີຄວາມຫຼາກຫຼາຍ ແລະ ເປັນໂອກາດອັນດີ ເພື່ອເປັນການແລກປ່ຽນຄວາມຮູ້ ແລະ ປະສົບການ ໃນການພັດທະນາເວັບໄຊ, ເປັນການສ້າງຄວາມອາດສາມາດ ແລະ ເຮັດໃຫ້ລັດຖະກອນ ເຂົ້າໃຈຄວາມສໍາຄັນ ແລະ ສາມາດຖອດຖອນບົດຮຽນ ແລະ ປັບໃຊ້ໃນການພັດທະນາວຽກງານການສ້າງ ແລະ ນຳເອົາຜົນງານໄປຕໍ່ຍອດ ໃນການສ້າງນະວັດຕະກຳໃໝ່ໆ ເພື່ອມາຮັບໃຊ້ໃນວຽກງານ ແລະ ສັງຄົມ.