ກອງປະຊຸມໃຫຍ່ ຄັ້ງທີ III ຂອງກຳມະບານຮາກຖານ ສູນບໍລິຫານລັດດິຈິຕອນ, ກະຊວງ ເຕັກໂນໂລຊີ ແລະ ການສື່ສານ

26/03/2024

ກອງປະຊຸມໃຫຍ່ ຄັ້ງທີ III  ຂອງກຳມະບານຮາກຖານ ສູນບໍລິຫານລັດດິຈິຕອນ, ກະຊວງ ເຕັກໂນໂລຊີ ແລະ ການສື່ສານ

ກຳມະບານຮາກຖານ ສູນບໍລິຫານລັດດິຈິຕອນ (ສລດ), ກະຊວງເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມໃຫຍ່ ຄັ້ງທີ III ຂຶ້ນໃນວັນທີ 21 ມີນາ 2024, ທີ່ຫ້ອງປະຊຸມໃຫຍ່ ຂອງກະຊວງເຕັກໂນໂລຊີ ແລະ ການສື່ສານ (ເຂດສີສະເກດ) ໂດຍໃຫ້ກຽດເຂົ້າຮ່ວມເປັນຄະນະປະທານຂອງ ສະຫາຍ ປອ. ທະວີສັກ ມະໂນທັມ ຄະນະປະຈໍາພັກກະຊວງ, ເລຂາໜ່ວຍພັກສູນບໍລິຫານລັດດິຈິຕອນ ແລະ ສະຫາຍ ສຸດໃຈ ພິມມະສີ ປະທານສະຫະພັນກໍາມະບານ ກະຊວງເຕັກໂນໂລຊີ ແລະ ການສື່ສານ, ສະຫາຍ ພູຊະນະ ສິລິວົງ ປະທານກຳມະບານຮາກຖານສູນບໍລິຫານລັດດິຈິຕອນ, ມີເລຂາຊາວໜຸ່ມຮາກຖານ, ປະທານສະຫະພັນແມ່ຍິງ ແລະ ສະມາຊິກພັກກຳມະບານ ພາຍໃນສູນບໍລິຫານລັດດິຈິຕອນ ເຂົ້າຮ່ວມທັງໝົດ 49 ສະຫາຍ, ຍິງ 19 ສະຫາຍ.

ກອງປະຊຸມຄັ້ງນີ້, ສະຫາຍ ພູຊະນະ ສິລິວົງ  ໄດ້ຂຶ້ນກ່າວເປີດພິທີ ພ້ອມທັງຜ່ານບົດສະຫຼຸບຕີລາຄາຜົນງານ ການເຄື່ອນໄຫວນໍາພາ ຈັດຕັ້ງປະຕິບັດວຽກງານ ໄລຍະປີ 2021-2024 ແລະ ທິດທາງແຜນການໃນຕໍ່ໜ້າ (2026-2030) ຂອງກຳມະບານຮາກຖານສູນບໍລິຫານລັດດິຈິຕອນ. ພ້ອມນັ້ນ, ສະຫາຍ ພຸດທະພອນ ຫຼວງແກ້ວ ຮອງປະທານ, ປະທານກວດກາ ກຳມະບານຮາກຖານສູນບໍລິຫານລັດດິຈິຕອນ ໄດ້ຜ່ານບົດສໍາຫຼວດການນໍາພາ ແລະ ຄະນະກຳມະບານຮາກຖານສູນບໍລິຫານລັດດິຈິຕອນ ຊຸດເກົ່າ ຂຶ້ນກ່າວອໍາລາໜ້າທີ່. ໃນວາລະກອງປະຊຸມ ຍັງໄດ້ຈັດພິທີມອບໃບຍ້ອງຍໍໃຫ້ແກ່ ຄະນະໜ່ວຍພັກ ສລດ, ຄະນະສະຫະພັນກຳມະບານກະຊວງ ຜູ້ຊີ້ນຳ ຮາກຖານກຳມະບານ ສລດ ແລະ ຄະນະບໍລິຫານງານຮາກຖານ ສລດ ຈໍານວນ 06 ສະຫາຍ, ໃນການ ປະກອບສ່ວນເຄື່ອນໄຫວວຽກງານ 5 ເປັນເຈົ້າ ປະຈຳປີ 2023 ຂອງຮາກຖານກຳມະບານ ສລດ.

ໃນໂອກາດອັນສະຫງ່າລາສີນີ້, ສະຫາຍ ປອ. ທະວີສັກ ມະໂນທັມ ຄະນະປະຈໍາພັກກະຊວງ, ເລຂາໜ່ວຍພັກ ສູນບໍລິຫານລັດດິຈິຕອນ ກໍໄດ້ມີຄໍາເຫັນສະແດງຄວາມຍ້ອງຍໍຊົມເຊີຍ ແລະ ຍົກໃຫ້ເຫັນເຖິງຄວາມໝາຍຄວາມສໍາຄັນ ຂອງ ການດໍາເນີນກອງປະຊຸມໃຫຍ່ ຄັ້ງທີ III ຂອງ ກຳມະບານຮາກຖານ ສູນບໍລິຫານລັດດິຈິຕອນ ຊຶ່ງເປັນການຢັ້ງຢືນ ເຖິງການປະຕິບັດກົດລະບຽບຂອງພັກ, ກົດໝາຍຂອງລັດ ແລະ ທັງເປັນການຕອບສະໜອງຄວາມມຸ້ງໝັ້ນປາດຖະໜາ ຂອງສະມາຊິກກຳມະບານ ພາຍໃນ ສລດ, ທີ່ຈະໄດ້ມີການປັບປຸງການຈັດຕັ້ງກຳມະບານຮາກຖານ ແລະ ເລືອກຕັ້ງ ເອົາບຸກຄະລາກອນເຂົ້າມາເປັນຄະນະກໍາມະບານຮາກຖານ ຊຸດໃໝ່ ເພື່ອໃຫ້ຮັບປະກັນການປະຕິບັດໜ້າທີ່ວຽກງານ ໃນ ໄລຍະໃໝ່ ໃຫ້ມີຜົນສຳເລັດເປັນຢ່າງດີ.

ຫຼັງຈາກທີ່ຄະນະກຳມະບານຮາກຖານ ສລດ ຊຸດເກົ່າ ໄດ້ກ່າວອຳລາໜ້າທີ່. ຄະນະຮັບຜິດຊອບການປ້ອນບັດ ກຳມະບານຮາກຖານ ສລດ ກໍ່ໄດ້ເປີດກອງປະຊຸມຄັດເລືອກປ່ອນບັດເອົາຄະນະກຳມະບານຮາກຖານ ສລດ ຊຸດໃໝ່. ເພື່ອໃຫ້ບັນດາສະມາຊິກກຳມະບານ ໄດ້ໃຊ້ສິດປະຊາທິປະໄຕ ເລືອກເອົາຄະນະກໍາມະບານຮາກຖານ ຊຸດໃໝ່ ຊຶ່ງມີຜູ້ລົງສະໝັກເລືອກຕັ້ງ ຈໍານວນ 07 ສະຫາຍ ແລະ ເລືອກເອົາຄະນະບໍລິຫານງານຊຸດໃໝ່ ຈຳນວນ 05 ສະຫາຍ.

ຜ່ານການປ່ອນບັດເລືອກຕັ້ງ ຜົນການເລືອກຕັ້ງໄດ້ຄະນະຮາກຖານກຳມະບານ ຈຳນວນ 05 ສະຫາຍ. ກອງປະຊຸມຄັ້ງປະຖົມມະລຶກຄົບຄະນະໄດ້ເຫັນດີເປັນເອກະພາບເລືອກເອົາ:

  1. ສະຫາຍ ສຸກສະຫວັນ ທໍາມະວົງ ເປັນປະທານ
  2. ສະຫາຍ ວຽງສະຫວັນ ຫຼວງວິໄລ ເປັນຮອງປະທານ ແລະ ເປັນປະທານກວດກາ
  3. ສະຫາຍ ນາງ ພອນທິບ ທໍາມະວົງ ເປັນຮອງປະທານ
  4. ສະຫາຍ ນາງ ພຸດທະພອນ ຫຼວງແກ້ວ ເປັນກຳມະການ
  5. ສະຫາຍ ສົມປະສົງ ພິພັກຂະວົງ ເປັນກຳມະການ

ຕອນທ້າຍຂອງກອງປະຊຸມ, ສະຫາຍ ສຸດໃຈ ພິມມະສີ ປະທານສະຫະພັນກຳມະບານ ກະຊວງເຕັກໂນໂລຊີ ແລະ ການສື່ສານ ກໍໄດ້ສະແດງຄວາມຊົມເຊີຍຜົນສໍາເລັດຂອງກອງປະຊຸມ ແລະ ໃຫ້ກຽດໂອ້ລົມຕໍ່ກອງປະຊຸມໃຫຍ່ ຄັ້ງທີ III ຂອງກຳມະບານຮາກຖານສູນບໍລິຫານລັດດິຈິຕອນ ໃນທ່າມກາງບັນຍາກາດ ແຫ່ງຄວາມປິຕິຍິນດີ ຂອງສະມາຊິກ ກຳມະບານພາຍໃນ ສລດ, ເພື່ອສຸມຈິດສຸມໃຈ ໃສ່ອອກແຮງແຂ່ງຂັນກັນ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ II ຂອງອົງຄະນະພັກ ກຕສ ແລະ ກອງປະຊຸມ ຄັ້ງທີ III ຂອງໜ່ວຍພັກສູນບໍລິຫານລັດດິຈິຕອນ, ໂດຍສະເພາະການຈັດຕັ້ງ ປະຕິບັດມະຕິກອງປະຊຸມໃຫຍ່ ຄັ້ງທີ III ຂອງ ສະຫະພັນກຳມະບານ ກຕສ ໃຫ້ປາກົດຜົນເປັນຈິງ. ນອກຈາກນີ້, ສະຫາຍຍັງໄດ້ເນັ້ນໜັກໃຫ້ສະມາຊິກກຳມະບານທຸກສະຫາຍ ເອົາໃຈໃສ່ປະຕິບັດສອງໜ້າທີ່ຍຸດທະສາດຂອງຊາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ. ພ້ອມທັງ, ເຄື່ອນໄຫວວຽກງານຕາມທິດທາງຂອງພັກ ແລະ ກົນໄກຂອງລັດ, ຄ່ຽງຄູ່ໄປກັບການປະຕິບັດໜ້າທີ່ເປັນເສນາທິການ ໃຫ້ຄະນະພັກກະຊວງ, ຄະນະໜ່ວຍພັກ, ຄະນະສະຫະພັນກຳມະບານກະຊວງ ເປັນເຈົ້າການເຕົ້າໂຮມຄວາມສາມັກຄີພາຍໃນ, ເປັນເຈົ້າການໃນການປະຕິບັດພາລະບົດບາດ ແລະ ໜ້າທີ່ຍຸດທະສາດ ຂອງພັກ-ລັດ ເຮັດບົດບາດໃນການເປັນຕົວແທນໃຊ້ສິດ, ການປົກປ້ອງສິດ ແລະ ຜົນປະໂຫຍດອັນຊອບທຳ ຂອງອ້າຍນ້ອງສະມາຊິກກຳມະບານພາຍໃນກະຊວງ ຕສ, ກໍຄືສະມາຊິກກຳມະບານ ພາຍໃນ ສູນບໍລິຫານລັດດິຈິຕອນ.

ກອງປະຊຸມໄດ້ປິດລົງ ໃນເວລາ 12:00 ໂມງ ຂອງມື້ດຽວກັນ

 

 

ລົງທະບຽນປະຊຸມ
ວາ​ລະ​ສານ ໄອ​ຊີ​ທີ
ໜັງສືພິມ