ສະຫະພັນແມ່ຍິງຮາກຖານສູນບໍລິຫານລັດດິຈິຕອນ, ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ເປີດກອງປະຊຸມໃຫຍ່ ຄັ້ງທີ III ຂອງຕົນຂຶ້ນ ໃນຕອນບ່າຍຂອງວັນທີ 03 ພຶດສະພາ 2024, ທີ່ຫ້ອງປະຊຸມຊັ້ນ 04 ຕຶກໃນເຂດຮົ້ວ ສນຍ. ໃຫ້ກຽດເຂົ້າຮ່ວມໂດຍ ສະຫາຍ ປະລິນຍາເອກ ທະວີສັກ ມະໂນທັມ ຄະນະພັກກະຊວງ, ເລຂາໜ່ວຍພັກສູນບໍລິຫານລັດດິຈິຕອນ ແລະ ສະຫາຍ ນາງ ເກສອນ ສຸລິວົງ ຄະນະພັກກະຊວງ, ຄະນະບໍລິຫານງານສະຫະພັນແມ່ຍິງລາວ, ປະທານສະຫະພັນແມ່ຍິງກະຊວງ ຕສ, ມີເລຂາໜ່ວຍຊາວໜຸ່ມ ແລະ ຕາງໜ້າປະທານກຳມະບານສູນບໍລິຫານລັດດິຈິຕອນ, ແຂກຜູ້ຕາງໜ້າຈາກບັນດາສະຫະພັນແມ່ຍິງຮາກຖານບັນດາກົມ/ທຽບເທົ່າ ພາຍໃນກະຊວງ ຕສ ຊຶ່ງມີຜູ້ເຂົ້າຮ່ວມ ທັງໝົດຈຳນວນ 24 ສະຫາຍ ແລະ ແຂກຖືກເຊີນ 05 ສະຫາຍ, ຍິງ 14 ສະຫາຍ ແລະ ຊາຍ 05 ສະຫາຍ.

ໃນກອງປະຊຸມ, ບັນດາຜູ້ແທນໄດ້ຮັບຟັງການຜ່ານບົດລາຍງານການເມືອງ ຕີລາຄາຜົນການຈັດຕັ້ງປະຕິບັດວຽກງານ ໃນໄລຍະ 05 ປີຜ່ານມາ (2021-2025) ແລະ ວາງທິດທາງແຜນການໃນ 05 ປີຕໍ່ໜ້າ (2026-2030) ແລະ ບົດສຳຫຼວດການນໍາພາຊີ້ນໍາລວມ ແລະ ກອງປະຊຸມໄດ້ຮັບຮອງເອົາທັງ 2 ບົດດັ່ງກ່າວ ຊຶ່ງໃນໄລຍະຜ່ານມາ ຄະນະສະຫະພັນຮາກຖານແມ່ຍິງສູນບໍລິຫານລັດດິຈິຕອນ ໄດ້ນໍາພາ-ຊີ້ນໍາວຽກງານຮອບດ້ານ ເຮັດໃຫ້ອົງການຈັດຕັ້ງສະຫະພັນແມ່ຍິງມີຄວາມເຂັ້ມແຂງຂຶ້ນ ແລະ ມີຄວາມກ້າວໜ້າ ປະກອບສ່ວນສ້າງຜົນງານລວມຂອງ ສູນບໍລິຫານລັດດິຈິຕອນ ແລະ ປະຕິບັດພາລະບົດບາດໜ້າທີ່ ຂອງແມ່ຍິງ ເຊັ່ນ: ການຈັດຕັ້ງປະຕິບັດຂໍ້ແຂ່ງຂັນ 3 ດີ, ການສົ່ງເສີມຄວາມກ້າວໜ້າແມ່ຍິງ, ວຽກແມ່ ແລະ ເດັກ ແລະ ເຂົ້າຮ່ວມບັນດາກິດຈະກໍາຕ່າງໆ ຂອງທາງ ສູນກາງສະຫະພັນແມ່ຍິງ ແລະ ແມ່ຍິງກະຊວງ ຕສ ຈັດຂຶ້ນ.

ໃນໂອກາດນີ້, ສະຫາຍ ປະລິນຍາເອກ ທະວີສັກ ມະໂນທັມ ຄະນະພັກກະຊວງ, ເລຂາໜ່ວຍພັກສູນບໍລິຫານລັດດິຈິຕອນ  ແລະ ສະຫາຍ ນາງ ເກສອນ ສຸລິວົງ ຄະນະພັກກະຊວງ, ຄະນະບໍລິຫານງານສະຫະພັນແມ່ຍິງລາວ, ປະທານສະຫະພັນແມ່ຍິງກະຊວງ ຕສ ກໍ່ໄດ້ໃຫ້ກຽດມີຄຳເຫັນໂອ້ລົມຕໍ່ກອງປະຊຸມ ຊຶ່ງສະຫາຍໄດ້ສະແດງຄວາມຊົມເຊີຍຕໍ່ຜົນງານຂອງ ຄະນະສະຫະພັນແມ່ຍິງຮາກຖານສູນບໍລິຫານລັດດິຈິຕອນ ຍາດມາໄດ້ໃນໄລຍະ 5 ປີ ຜ່ານມາ ແລະ ໄດ້ເນັ້ນໜັກໃຫ້ສະມາຊິກແມ່ຍິງສູນບໍລິຫານລັດດິຈິຕອນ ຈົ່ງພ້ອມກັນສູ້ຊົນປະຕິບັດວຽກງານໃຫ້ສໍາເລັດຕາມຄາດໝາຍທີ່ວາງໄວ້ໃນຕໍ່ໜ້າ. ພ້ອມກັນນັ້ນ, ກອງປະຊຸມກໍ່ໄດ້ໃຊ້ສິດປະຊາທິປະໄຕ ໃນການຄັດເລືອກເອົາຄະນະບໍລິຫານງານສະຫະພັນແມ່ຍິງຮາກຖານຊຸດໃໝ່ ດ້ວຍຄວາມຮັບຜິດຊອບສູງ ຊຶ່ງກອງປະຊຸມກໍ່ໄດ້ສໍາເລັດຕາມຄາດໝາຍ ແລະ ຈົບລົງຢ່າງສະຫງ່າງາມ.