ໃນຕອນເຊົ້າ ຂອງວັນທີ 13 ສິງຫາ 2024, ສູນບໍລິຫານລັດດິຈິຕອນ, ກະຊວງເຕັກໂນໂລຊີ ແລະ ການສື່ສານ ໄດ້ຈັດຝຶກອົບຮົມ ຊຸກຍູ້ການນຳໃຊ້ ລະບົບຈົດໝາຍເອເລັກໂຕຣນິກ (e-Mail) ໃຫ້ກັບຫ້ອງການ, ກົມ, ສູນ, ອົງການ ແລະ ສະຖາບັນ ພາຍໃນ ກະຊວງ ເຕັກໂນໂລຊີ ແລະ ການສື່ສານ ທີ່ຫ້ອງປະຊຸມໃຫຍ່ຊັ້ນ​ 01​ ຕຶກ Fຂອງສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ໂດຍການເປັນປະທານຂອງ ທ່ານ ປອ. ທະວີສັກ ມະໂນທັມ ຫົວໜ້າສູນບໍລິຫານລັດດິຈິຕອນ (ສລດ), ຊຶ່ງມີຕາງໜ້າຈາກບັນດາຫ້ອງການ, ກົມ, ສູນ,​ອົົງການ ແລະ ສະຖາບັນ ພາຍໃນກະຊວງເຕັກໂນໂລຊີ ແລະ ການສື່ສານ ເຂົ້າຮ່ວມທັງໝົດ ຈຳນວນ 31 ທ່ານ

ຈຸດປະສົງຂອງຝຶກອົບຮົມໃນຄັ້ງນີ້ ແມ່ນເພື່ອແນະນໍາການນຳໃຊ້ລະບົບຈົດໝາຍເອເລັກໂຕຣນິກ ຂອງພາກລັດ ໃນໄລຍະຜ່ານມາ ແລະ ຊຸກຍູ້ສົ່ງເສີມການນໍາໃຊ້ໃຫ້ກວ້າງຂວາງຍິ່ງຂຶ້ນ, ພ້ອມທັງເປັນເວທີແລກປ່ຽນບົດຮຽນ ແລະ ສອບຖາມຄວາມຄິດເຫັນໃນການນຳໃຊ້ລະບົບຈົດໝາຍເອເລັກໂຕຣນິກພາກລັດ ເພື່ອນໍາເອົາຂໍ້ມູນດັ່ງກ່າວມາຖອດຖອນບົດຮຽນ ແລະ ປັບປຸງພັດທະນາລະບົບ ໃຫ້ສາມາດບໍລິການບັນດາຂອງອົງການຈັດຕັ້ງພາກລັດໃຫ້ດີຂຶ້ນກວ່າເກົ່າ

ໃນການຝຶກອົບຮົມ ໄດ້ນໍາສະເໜີ ແລະ ເນັ້ນໜັກໃຫ້ເຫັນຄວາມສຳຄັນກ່ຽວກັບວຽກງານການຫັນເປັນດິຈິຕອນ ຂອງ ສປປ ລາວ ຊຶ່ງໄດ້ກຳນົດ 03 ເສົາຄ້ຳຍຸດທະສາດ ຄື: ລັດຖະບານດິຈິຕອນ, ເສດຖະກິດດິຈິຕອນ, ສັງຄົມດິຈິຕອນ ຊຶ່ງການຫັນເປັນລັດຖະບານດິຈິຕອນ ແມ່ນໜຶ່ງໃນວຽກງານທີ່ສໍາຄັນ. ສະນັ້ນ, ການຫັນເປັນລັດຖະບານດິຈິຕອນ ກໍຄື ຫັນການບໍລິຫານ ແລະ ບໍລິການຂອງພາກລັດເປັນດິຈິຕອນ ໃນທຸກຂະແໜງການໃຫ້ເປັນຮູບປະທໍາ ໂດຍນໍາໃຊ້ເຄື່ອງມືເຕັກໂນໂລຊີດິຈິຕອນທີ່ທັນສະໄໝ, ລະບົບຈົດໝາຍເອເລັກໂຕຣນິກ ກໍ່ເປັນອີກໜຶ່ງລະບົບທີ່ມີຄວາມສຳຄັນ ແລະ ໃຫ້ບໍລິການແກ່ບັນດາກະຊວງ/ອົງການຈັດຕັ້ງພັກ-ລັດ ການນຳໃຊ້ລະບົບຈົດໝາຍເອເລັກໂຕຣນິກ ຂອງບັນດາກະຊວງ/ອົງການຈັດຕັ້ງພັກ-ລັດ ແມ່ນເປັນການນໍາໃຊ້ລະຫັດຊື່ເປັນຂອງຕົນເອງ ໃນການຕິດຕໍ່ສື່ສານ ແລະ ພົວພັນວຽກງານກັບບັນດາອົງກອນທັງພາຍໃນ ແລະ ຕ່າງປະເທດ ຊຶ່ງເປັນຮູບແບບທີ່ຮັບປະກັນຄວາມປອດໄພ. ໃນການຝຶກອົບຮົມຍັງໄດ້ສາທິດ ແລະ ແນະນຳການນຳໃຊ້ລະບົບ ເພື່ອໃຫ້ມີຄວາມສະດວກ ແລະ ວ່ອງໄວ ໃນການຮັບ-ສົ່ງຈົດໝາຍເອເລັກໂຕຣນິກ

ໃນຕອນທ້າຍຂອງການຝຶກອົບຮົມ ໄດ້ເປີດໂອກາດໃຫ້ຜູ້ເຂົ້າຮ່ວມ ສົນທະນາ ແລະ ແລກປ່ຽນຄໍາເຫັນກ່ຽວກັບປະສົບການໃນການນຳໃຊ້ລະບົບຈົດໝາຍເອເລັກໂຕຣນິກຂອງພາກສ່ວນຕ່າງໆຂອງພາກລັດ ຢ່າງຝົດຟຶ້ນ ຊຶ່ງຜູ້ເຂົ້າຮ່ວມໄດ້ປະກອບສ່ວນໃນການສະໜອງຂໍ້ມູນ, ຂໍ້ສະເໜີຕ່າງໆ ເພື່ອເປັນການຕໍ່ຍອດປັບປຸງການພັດທະນາ ລະບົບຈົດໝາຍເອເລັກໂຕຣນິກ ແລະ ສາມາດຜັນຂະຫຍາຍລະບົບດັ່ງກ່າວ ເຂົ້າໃນວຽກງານຕົວຈິງຢ່າງມີປະສິດທິພາບສູງ ແລະ ເປັນບາດກ້າວຕໍ່ໄປ ເພື່ອກ້າວໄປສູ່ການຫັນເປັນລັດຖະບານດິຈິຕອນໃນອານາຄົດ