ໃນວັນທີ 21 ສິງຫາ 2024 ສູນບໍລິຫານລັດດິຈິຕອນ (ສລດ) ກະຊວງ ເຕັກໂນໂລຊີ ແລະ ການສື່ສານ, ໄດ້ຈັດກອງປະຊຸມສຳມະນາເຜີຍແຜ່ການນຳໃຊ້ລະບົບກະດານຂໍ້ມູນຊຸມຊົນລາວພາກລັດ (Government LaoPedia) ໃຫ້ກັບບັນດາອົງການຈັດຕັ້ງພັກ-ລັດ, ອົງການຈັດຕັ້ງມະຫາຊົນ ຂັ້ນສູນກາງ ຂື້ນທີ່ຫ້ອງປະຊຸມຊັ້ນ 01 ຕຶກ F ສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ກະຊວງ ເຕັກໂນໂລຊີ ແລະ ການສື່ສານ. ໂດຍການເປັນປະທານຂອງທ່ານ ນາງ ຈິດຕະພອນ ຈັນສີລິລາດ ຮອງຫົວໜ້າສູນບໍລິຫານລັດດິຈິຕອນ, ໂດຍມີຜູ້ເຂົ້າຮ່ວມທັງໝົດຈຳນວນ 40 ທ່ານຍິງ 07ທ່ານ

ການຈັດສຳມະນາໃນຄັ້ງນີ້ມີຈຸດປະສົງ ເພື່ອເຜີຍແຜ່ການນຳໃຊ້ລະບົບກະດານຂໍ້ມູນຊຸມຊົນລາວພາກລັດ (Government LaoPedia) ໃຫ້ພະນັກງານຂອງພາກລັດກໍ່ຄືພະນັກງານຂອງບັນດາອົງການຈັດຕັ້ງພັກ-ລັດ, ອົງການຈັດຕັ້ງມະຫາຊົນ ຂັ້ນສູນກາງໃຫ້ຮັບຮູ້, ເຂົ້າໃຈ ແລະ ສາມາດນຳໃຊ້ລະບົບດັ່ງກ່າວໃນການເຜີຍແຜ່ຂໍ້ມູນຂ່າວສານໃຫ້ແກ່ປະຊາຊົນ ແລະ ສັງຄົມ. ພ້ອມທັງເປັນການຊຸກຍູ້ສົ່ງເສີມການຫັນເປັນທັນສະໄໝຂອງພາກລັດ

ດັ່ງນັ້ນ, ລະບົບການດານຂໍ້ມູນຊຸມຊົນລາວພາກລັດ ( Government LaoPedia ) ຈຶ່ງເປັນເຄື່ອງມືໜຶ່ງທີ່ສຳຄັນ ທີ່ຈະຊ່ວຍບັນດາອົງການຈັດຕັ້ງພາກລັດພວກເຮົາ ໃນການຊຸກຍູ້-ສົ່ງເສີມ ການສ້າງຂໍ້ມູນເປີດຂອງພາກລັດ ໃຫ້ມີຄວາມຫຼາກຫຼາຍ ໃນການໃຫ້ບໍລິການດ້ານຂໍ້ມູນຂ່າວສານພາກລັດ ສູ່ສັງຄົມໃຫ້ກວ້າງຂວາງ ແລະ ເພື່ອໃຫ້ປະຊາຊົນນັກຮຽນ, ນັກສຶກສາ, ພາກທຸລະກິດສາມາດເຂົ້າເຖິງຂໍ້ມູນ ຂອງພາກລັດໄດ້ຢ່າງສະດວກ, ມີຄວາມປອດໄພ ແລະ ເຮັດໃຫ້ລະບົບການດານຂໍ້ມູນຊຸມຊົນລາວພາກລັດ ( Government LaoPedia ) ໃຫ້ກາຍເປັນແຫຼ່ງສູນລວມຂໍ້ມູນຂ່າວສານຂອງບັນດາອົງການຈັດຕັ້ງພາກລັດ ທຸກຂະແໜງການ ໃນທົ່ວປະເທດ. ຊື່ງແຕ່ລະພາກສ່ວນຈະມີສ່ວນຮ່ວມໃນການສະໜອງຂໍ້ມູນທີ່ກ່ຽວຂ້ອງ ກັບຂອງອົງການຈັດຕັ້ງຕົນເອງຮັບຜິດຊອບ ເພື່ອສະໜອງຂໍ້ມູນເປີດ ໃຫ້ບໍລິການດ້ານຂໍ້ມູນແກ່ອົງການຈັດຕັ້ງລັດດ້ວຍກັນ, ປະຊາຊົນ ແລະ ພາກທຸລະກິດ. ສາມາດນຳໃຊ້ຂໍ້ມູນ ເພື່ອການຄົ້ນຄວ້າວິໄຈ ແລະ ສຶກສາໃນດ້ານຕ່າງໆ ບໍ່ວ່າຈະເປັນດ້ານການລົງທຶນ, ການທ່ອງທ່ຽວ, ດ້ານປະຫວັດສາດ, ເຕັກໂນໂລຊີ ແລະ ອື່ນໆ ຜ່ານ www.laopedia.gov.la.

ນອກຈາກນີ້ປະຊາຊົນຍັງຈະໄດ້ມີສ່ວນຮ່ວມໃນການປະກອບສະແດງຄວາມຄິດເຫັນກັບພາກລັດ. ນອກຈາກຄວາມສະດວກໃນການຊອກຫາຂໍ້ມູນແລ້ວ, ຂໍ້ມູນຍັງມີຄວາມຖືກຕ້ອງ ໜ້າເຊື່ອຖື ເພາະຂໍ້ມູນໄດ້ຮັບການກັ່ນຕອງ ກວດແກ້ຄວາມຖືກຕ້ອງຂອງຂໍ້ມູນຈາກພາກສ່ວນທີ່ກ່ຽວຂ້ອງ

ໃນຕອນທ້າຍ ທ່ານ ນາງ ຈິດຕະພອນ ຈັນສີລິລາດ ປະທານກອງປະຊຸມ ໄດ້ມີຄຳເຫັນຕໍ່ກອງປະຊຸມສຳມະນາ ໂດຍຊີ້ໃຫ້ເຫັນເຖິງຄວາມສຳຄັນຂອງລະບົບກະດານຂໍ້ມູນຊຸມຊົນລາວພາກລັດ (Government LaoPedia), ພ້ອມນັ້ນຍັງໄດ້ເນັ້ນໃຫ້ທຸກພາກສ່ວນ ຈົ່ງພ້ອມກັນສືບຕໍ່ຂະຫຍາຍ ການນຳໃຊ້ລະບົບກະດານຂໍ້ມູນຊຸມຊົນລາວພາກລັດ (Government LaoPedia) ໃນການໃຫ້ບໍລິການສັງຄົມ, ພ້ອມທັງເຜີຍແຜ່ ແລະ ຊຸກຍູ້ສົ່ງເສີມໃຫ້ການບໍລິການດ້ານຂໍ້ມູນຂ່າວສານຂອງຂະແໜງຕົນເອງ ໃຫ້ປະຊາຊົນສາມາດເຂົ້າເຖິງຂໍ້ມູນພາກລັດໄດ້ຢ່າງສະດວກ ແລະ ມີຄວາມປອດໄພ

ກອງປະຊຸມສຳມະນາ ໄດ້ສິ້ນສຸດລົງ ໃນຕອນເຊົ້າ ວັນທີ 21 ສິງຫາ 2024 ເວລາ 11:30 ໂມງ.