ໃນວັນທີ 28 ສິງຫາ 2024, ກະຊວງ ເຕັກໂນໂລຊີ ແລະ ການສື່ສານ, ສູນບໍລິຫານລັດດິຈິຕອນ ໃນນາມຜູ້ຈັດຕັ້ງພິທີ ໄດ້ຈັດກອງປະຊຸມສຳມະນາ ການພັດທະນາມາດຕະຖານເຊື່ອມຕໍ່ລັດດິຈິຕອນ ຂອງ ສປປ ລາວ(Development of e-Government Interoperability Framework awareness raising workshop) ພາຍໃຕ້ການເປັນປະທານ ໂດຍ ທ່ານ  ນາງ ວັນນະພາ ພົມມະທັນສີ, ຮອງຫົວໜ້າສູນບໍລິຫານລັດດິຈິຕອນ ເຊິ່ງມີຕາງໜ້າຈາກບັນດາກົມ, ສູນ, ອົງການ, ສະຖາບັນ ພາຍໃນກະຊວງ ເຕັກໂນໂລຊີ ແລະ ການສື່ສານ, ບັນດາກະຊວງອ້ອມຂ້າງ, ຕາງໜ້າຈາກອົງການຂໍ້ມູນຂ່າວສານແຫ່ງຊາດ (NIA), ຄະນະທີ່ປຶກສາຈາກ ບໍລິສັດ KTC ສ.ເກົາຫຼີ, ລວມຜູ້ເຂົ້າຮ່ວມທັງໝົດ 50 ທ່ານ

ຈຸດປະສົງຂອງການຈັດກອງປະຊຸມສໍາມະນາໃນຄັ້ງນີ້ແມ່ນ ເພື່ອສ້າງຄວາມຮັບຮູ້ ແລະ ຄວາມເຂົ້າໃຈກ່ຽວກັບມາດຕະຖານເຊື່ອມໂຍງພາກລັດ (e-GIF), ນຳສະເໜີບັນດາມາດຕະຖານສາກົນ, ຄວາມຈໍາເປັນໃນການພັດທະນາມາດຕະຖານການເຊື່ອມຕໍ່ ລັດດິຈິຕອນ ແລະ ແນະນໍາ ແບບສອບຖາມ ໃນການເກັບກໍາຂໍ້ມູນເພື່ອພັດທະນາຂອບມາດຕະຖານການເຊື່ອມຕໍ່ລັດດິຈິຕອນ ສໍາລັບ ສ ປປ ລາວ ແລະ ຍົກລະດັບຄວາມຮູ້ຄວາມສາມາດຂອງພະນັກງານ-ລັດຖະກອນ ຂອງກະຊວງ ເຕັກໂນໂລຊີ ແລະ ການສື່ສານ ແລະ ບັນດາກະຊວງອ້ອມຂ້າງ ໃນຂົງເຂດດິຈິຕອນ ໃຫ້ເຂົ້າໃຈວຽກງານມາດຕະຖານລະບົບ ໃຫ້ຫຼາຍຂຶ້ນ. ກອງປະຊຸມ ສໍາມະນາໃນຄັ້ງນີ້ ຈັດຂື້ນ ເປັນກິດຈະກໍາ ປີທີ 2 ພາຍໃຕ້ຂອບການຮ່ວມມື  ຂອງໂຄງການ ສູນຮ່ວມມືລັດດິຈິຕອນ ລາວ-ສ.ເກົາຫຼີ (DGCC) ທີ່ດໍາເນີນເປັນໄລຍະເວລາ 3 ປີ (ເລີ່ມແຕ່ປີ 2023-2025)  ລະຫວ່າງ ກະຊວງພາຍໃນ ແລະ ຄວາມປອດໄພ ສ. ເກົາຫຼີ (MOIS), ອົງການຂໍ້ມູນຂ່າວສານແຫ່ງຊາດ (NIA) ແລະ ກະຊວງ ຕສ     

ໃນຊ່ວງທ້າຍຂອງກອງປະຊຸມ ໄດ້ເປີດເວທີສົນທະນາ ແລກປ່ຽນ ແລະ ປຶກສາຫາລືປະກອບຄໍາຄິດເຫັນ, ຮັບຟັງຂໍ້ສະເໜີຕ່າງໆ ຈາກບັນດາກະຊວງອ້ອມຂ້າງ ແຂກທີ່ເຂົ້າຮ່ວມ ໂດຍສະເພາະສະພາບການພັດທະນາ ເຕັກນິກຂອງບັນດາລະບົບ, ສີ່ງທ້າທາຍ, ຂໍ້ສະເໜີ ເພື່ອການຮ່ວມມື ລະຫວ່າງພາກລັດໃນການສ້າງມາດຕະຖານ ຮ່ວມກັນ ເພື່ອຮັບປະກັນ ການເຊື່ອມໂຍງຂໍ້ມູນ, ຄວາມປອດໄພ ແລະ ເພື່ອຫຼຸດຜ່ອນການລົງທືນທີ່ຊໍ້າຊ້ອນ ແລະ ເພື່ອສາມາດຕໍ່ຍອດການພັດທະນາ ບັນດາລະບົບ ແລະ ພຣາດຟອມ ທີ່ມີປະສິດທິພາບ ແລະ ຄວາມຍືນຍົງໃນອະນາຄົດ.  ຜົນຂອງການສໍາມະນາ ແລະ ບົດຮຽນທີ່ຖອດຖອນໃນການປືກສາຫາລື ໃນຄັ້ງນີ້  ຈະນຳໄປຄົ້ນຄວ້າ ເພື່ອປະເມີນສະພາບການພັດທະນາ ແລະ ສ້າງບົດລາຍງານ ຂໍ້ສະເໜີ ກົນໄກການວາງມາດຕະຖານການເຊື່ອມຕໍ່ລັດດິຈິຕອນ ຂອງ ສປປ ລາວ ຢ່າງເໝາະສົມ, ສອດຄ່ອງກັບພາກພື້ນ ແລະ ສາກົນ

ກອງປະຊຸມສໍາມະນາດັ່ງກ່າວ  ເປັນໜື່ງໃນຂໍ້ລິເລີ່ມ ໃນການຊຸກຍູ້ ການພັດທະນາລັດຖະບານດິຈິຕອນ ຂອງ ສປປ ລາວ ແລະ ແຜນການຫັນເປັນດິຈິຕອນພາກລັດ ເພື່ອສຸມໃສ່ການປັບປຸງດັດສະນີການພັດທະນາລັດຖະບານດິຈິຕອນ ຂອງ ສປປ ລາວ ໃຫ້ດີຂຶ້ນເທື່ອລະກ້າວ