ໃນວັນທີ 02-07 ກັນຍາ 2024 ທີ່ຜ່ານມາ ທ່ານ ປອ. ທະວີສັກ ມະໂນທັມ, ຫົວໜ້າສູນບໍລິຫານລັດດິຈິຕອນ, ກະຊວງ ເຕັກໂນໂລຊີ ແລະ ການສື່ສານ (ກຕສ),  ໄດ້ນຳພາຄະນະ ຈາກ ກຕສ ລວມທັງໝົດ 10 ທ່ານ ເຂົ້າຮ່ວມກອງປະຊຸມສຳມະນາ ໃນຫົວຂໍ້: ການແລກປ່ຽນບົດຮຽນ ແລະ ສ້າງຄວາມອາດສາມາດໃນການຫັນເປັນດິຈິຕອນ (Capacity Building Workshop For Lao PDR’s Digital Transformation in South Korea) ທີ່ ສ. ເກົາຫຼີ ພາຍໃຕ້ ຂອບການຮ່ວມມືລະຫວ່າງລັດຖະບານ ລາວ-ເກົາຫຼີ ໂຄງການສູນການຮ່ວມມືລັດຖະບານດິຈິຕອນ (Digital Government Cooperation Center - DGCC), ຊຶ່ງກອງປະຊຸມສຳມະນາຄັ້ງນີ້ ແມ່ນຈັດຂຶ້ນໂດຍກະຊວງ MOIS ແລະ NIA ຂອງ ສ ເກົາຫຼີ

ຈຸດປະສົງຂອງກອງປະຊຸມສຳມະນາຄັ້ງນີ້ ແມ່ນ ເພື່ອແລກປ່ຽນບົດຮຽນ, ປະສົບການ ແລະ ຍົກລະດັບຄວາມຮູ້ ວຽກງານລັດຖະບານລັດດິຈິຕອນ ກັບ ສ.ເກົາຫຼີ ເປັນຕົ້ນ 1) ການສ້າງແຜນຍຸດທະສາດສົ່ງເສີມຂໍ້ມູນແບບເປີດພາກລັດ​ (Establishment of Lao PDR’s Open Government Data (OGD) Promotion Strategy);  2) ການສ້າງມາດຕະຖານການເຊື່ອມຕໍ່ລະບົບບໍລິຫານລັດດິຈິຕອນ (Establishment of Lao PDR’s  e-Government Interoperability Framework); 3) ການຄຸ້ມຄອງວຽກງານບໍລິຫານລັດດິຈິຕອນ ຂອງ ສ.ເກົາຫຼີ

ໃນກອງປະຊຸມສຳມະນາຄັ້ງນີ້, ຄະນະທີ່ເຂົ້າຮ່ວມ ໄດ້ຮຽນຮູ້ນຳບັນດາຜູ້ຊ່ຽວຊານຫຼາຍທ່ານຈາກ ກະຊວງພາຍໃນ ແລະ ຄວາມປອດໄພ (MOIS),  ແລະ ຈາກອົງການ NIA ສ.ເກົາຫຼີ ທີ່ໄດ້ນໍາສະເໜີສະພາບການພັດທະນາລັດຖະບານດິຈິຕອນ ຂອງ ສ.ເກົາຫຼີ ພ້ອມທັງ ນຳສະເໜີ ການຄຸ້ມຄອງການນໍາໃຊ້ຂໍ້ມູນຂອງພາກລັດໃຫ້ຖືກຕ້ອງຕາມວັດຖຸປະສົງ ແລະ ຕາມຫຼັກການ, ບັນດານະໂຍບາຍ, ມາດຕະຖານ, ເຕັກໂນໂລຊີ ແລະ ປະສົບການ ທີ່ຕິດພັນກັບວຽກງານດັ່ງກ່າວ.​ ນອກຈາກນີ້ ກອງປະຊຸມຍັງໄດ້ເປີດໂອກາດໃຫ້ກັບ ຄະນະທີ່ເຂົ້າຮ່ວມ ໄດ້ມີການສົນທະນາ ແລະ ແລກປ່ຽນບົດຮຽນ ກັບ ບັນດາຊ່ຽວຊານ, ໄດ້ພົບປະກັບ ບັນດາບໍລິສັດໃຫ້ບໍລິການທາງດ້ານດິຈິຕອນຂອງ ສ.ເກົາຫຼີ ເປັນຕົ້ນ ບໍລິສັດ RAON ທີ່ໃຫ້ການບໍລິການ Digital ID ແລະ ບໍລິສັດ USIGN ທີ່ໃຫ້ການບໍລິການລາຍເຊັນເອເລັກໂຕຣນິກ ເພື່ອແລກປ່ຽນບົດຮຽນ ແລະ ປະສົບການ ໃນການນຳໃຊ້ ການຢັ້ງຢືນຕົວຕົນແບບດິຈິຕອນ ມານຳໃຊ້ ໃນການເພີ່ມປະສິດທິພາບ ການບໍລິການລັດ ສູ່ປະຊາຊົນ ແລະ ສັງຄົມ

ພ້ອມກັນນັ້ນ, ຄະນະ ຍັງໄດ້ໄປຢ້ຽມຢາມ ສູນຄວບຄຸມການຈໍລະຈອນອັດສະລິຍະ (STOIS) ທີ່ນຳໃຊ້ລະບົບກ້ອງ CCTV ທັນສະໄໝ ເພື່ອປະເມີນຜົນ ແລະ ຄວບຄຸມການສັນຈອນ ແລະ ຮັກສາຄວາມປອດໄພ, ໄດ້ຢ້ຽມຢາມສູນຄົ້ນຄວ້າເຕັກໂນໂລຊີ ແລະ ໂທລະຄົມມະນາຄົມ (ETRI) ຊຶ່ງເປັນສູນຄົ້ນຄວ້າເຕັກໂນໂລຊີໃໝ່ ເພື່ອນຳໃຊ້ໃຫ້ແກ່ ທັງພາກລັດ ແລະ ເອກະຊົນ, ນອກຈາກນັ້ນ ໄດ້ຢ້ຽມ ສູນວາງສະແດງການພັດທະນາລັດດິຈິຕອນ (Digital Government Exhibit Hall)  ເຊິ່ງເຫັນໄດ້ວິວັດທະນາການ ຂອງການພັດທະນາລະບົບບໍລິການອອນລາຍ ຂອງພາກລັດ ຊຶ່ງບໍລິການໂດດເດັ່ນ ກໍ່ແມ່ນ ບໍລິການ Gov24 ຊຶ່ງເປັນລະບົບລວມສູນການໃຫ້ບໍລິການປະຊາຊົນ, ແລະ ສຸດທ້າຍ ແມ່ນໄດ້ໄປຢ້ຽມຢາມເຮັດວຽກ ຢູ່ຫ້ອງການ NIA ແລະ ໄດ້ປຶກສາຫາລື ເພື່ອຂໍການຊ່ວຍເຫຼືອຈາກ ສ.ເກົາຫຼີ ໂດຍສະເພາະ ແຜນຂໍ ODA ຈາກ APT-Korea ເພື່ອການພັດທະນາ ບຸກຄະລາກອນ ຂອງ ສປປ ລາວ ໃນວຽກງານ ຄວາມພ້ອມໃນການຫັນເປັນດິຈິຕອນ

ການໄປສຶກສາຄັ້ງນີ້ ແມ່ນເປັນປະໂຫຍດຫຼາຍ ໂດຍສະເພາະ ໄດ້ຍົກລະດັບ ຄວາມຮູ້ໃຫ້ກັບ ຄະນະຈາກ ກຕສ ໃນວຽກການລັດດິຈິຕອນ ເພື່ອນຳມາ ຜັນຂະຫຍາຍ ວຽກງານລັດດິຈິຕອນ ຂອງ ສປປ ລາວ ເປັນຕົ້ນ ການສ້າງມາດຕະຖານການເຊື່ອມຕໍ່ລະບົບບໍລິຫານລັດ, ການກຳນົດທິດທາງການພັດທະນາຂໍ້ມູນພາກລັດ, ພັດທະນາລະບົບຂໍ້ມູນເປີດພາກລັດ ແລະ ການພັດທະນາ ລະບົບບໍລິການຕ່າງໆຂອງພາກລັດ ໃນຕໍ່ໜ້າ