ໃນວັນທີ 19-22 ຕຸລາ 2024 ທີ່ຜ່ານມາ ທ່ານ ນ. ວັນນະພາ ພົມມະທັນສີ, ຮອງຫົວໜ້າສູນບໍລິຫານລັດດິຈິຕອນ, ກະຊວງ ເຕັກໂນໂລຊີ ແລະ ການສື່ສານ (ກຕສ),  ພ້ອມດ້ວຍ ພະນັກງານວິຊາການ 01 ທ່ານ ເຂົ້າຮ່ວມກອງປະຊຸມສຳມະນາ ໃນຫົວຂໍ້: ກອງປະຊຸມສຸດຍອດກ່ຽວກັບການຄຸ້ມຄອງຂໍ້ມູນສາກົນ ຂອງອົງການສະຫະປະຊາຊາດ “Global Symposium on Data and Digital Governance”, ຊຶ່ງກອງປະຊຸມສຳມະນາຄັ້ງນີ້ ແມ່ນຈັດຂຶ້ນໂດຍ ອົງການສະຫະປະຊາຊາດ ເພື່ອການພັດທະນາ ເສດຖະກິດ ສັງຄົມ (UN DESA)

ຈຸດປະສົງ ກອງປະຊຸມ ເພື່ອຂື້ນນໍາສະເໜີໃນວຽກງານຄຸ້ມຄອງລັດດິຈິຕອນ, ສິ່ງທ້າທາຍ ແລະ ກາລະໂອກາດລິເລີ່ມການຫັນການບໍລິຫານ ແລະ ບໍລິການລັດ ເພື່ອສະໜັບສະໜູນການພັດທະນາ ການບໍລິຫານ ແລະ ການບໍລິການລັດດິຈິຕອນ ສປປ ລາວ ແລະ ເຂົ້າຮ່ວມກອງປະຊຸມງານສັບປະດາ ອົງການສະຫະປະຊາຊາດ UN Geo Week ໂດຍເນັ້ນໜັກໃນການນຳໃຊ້ຂໍ້ມູນດິຈິຕອນ, ນະວັດຕະກຳ ,ນະໂຍບາຍ ແລະ ອື່ນໆ ເພື່ອສົ່ງເສີມການບັນລຸເປົ້າໝາຍການພັດທະນາແບບຍືນຍົງ ແລະ ເພື່ອຮັບຟັງການປະກາດຜົນ ແລະ ການອະທິບາຍຜົນຂອງການປະເມີນ UN E-government Index ປະຈໍາປີ 2024. ນອກນັ້ນຍັງໄດ້ຮັບຟັງ ບົດຮຽນ ແລະ ປະສົບການຂອງຫຼາຍປະເທດສະມາຊິກໃນພາກພື້ນອາຊີ ປາຊີຟີກ, ເອເຊຍກາງ, ອາຟຣິກກາ ແລະ ອາເມລິກາ ລາຕິນ ໃນດ້ານການຈັດການຂໍ້ມູນດິຈິຕອນຂອງພາກລັດ, ການສົ່ງເສີມຄວາມປອດໄພຂອງຂໍ້ມູນ ແລະ ການແບ່ງປັນການນໍາໃຊ້ຂໍ້ມູນ, ການຈັດການຂໍ້ມູນໃຫ້ມີປະສິດທິພາບ ໂດຍສະເພາະໃນຍຸກຂອງດິຈິຕອນທີ່ຂໍ້ມູນເປັນຊັບພະຍາກອນທີ່ມີຄວາມສຳຄັນສຳລັບການພັດທະນາ ເພື່ອຫຼຸດຜ່ອນຄວາມແຕກໂຕນຂໍ້ມູນດິຈິຕອນລະຫວ່າງປະເທດທີ່ພັດທະນາ ແລະ ປະເທດທີ່ກຳລັງພັດທະນາ ໃຫ້ສອດຄ່ອງກັບເປົ້າໝາຍການພັດທະນາແບບຍືນຍົງ ຂອງສະຫະປະຊາຊາດ

ສູນບໍລິຫານລັດ ໄດ້ເຂົ້າຮ່ວມ ໃນນາມໜື່ງໃນປະເທດ ທີ່ໄດ້ຮັບກິດຈະກໍາ ຈາກ ອົງການ UNDESA  ເພື່ອລາຍງານຜົນຄວາມຄືບໜ້າການປະເມີນຄວາມກ້າວໜ້າຂອງການພັດທະນາລັດຖະບານດິຈິຕອນ ຂອງ ສປປ ລາວ ແລະ ຜົນການສືກສາເບຶ້ອງຕົ້ນໃນການວາງແຜນການຄຸ້ມຄອງຂໍ້ມູນພາກລັດ, ພ້ອມນີ້ ໄດ້ນໍາສະເໜີ ສະພາບການພັດທະນາດິຈິຕອນຂອງ ສປປລາວ ແລະ ການກະກຽມຄວາມພ້ອມໃນການຄຸ້ມຄອງການນໍາໃຊ້ ເຕັກໂນໂລຊີ ປັນຍາປະດິດເຂົ້າໃນວຽກງານ ບໍລິການລັດ, ກາລະໂອກາດ ແລະ ສີ່ງທ້າທາຍ ຂອງ ສປປ ລາວ

ນອກນັ້ນ ຄະນະຍັງມີໂອກາດຍ້ຽມຊົມ ສູນຄຸ້ມຄອງສູນກາງໃນການຈັດການຂໍ້ມູນ ແລະ ການດໍາເນີນງານຂອງເມືອງຊຽງໄຮ້ “Shanghai urban IoT operation Center » ຊຶ່ງເປັນສູນກາງຂອງຂໍ້ມູນທີ່ຄວບຄຸມການໃນຈັດການຂໍ້ມູນຂອງເມືອງໂດຍການໃຊ້ເຕັກໂນໂລຊີ IoT ມາຊ່ວຍໃນການຈັດການລະບົບໄຟຟ້າ, ນຳ້ປະປາ, ຄວາມປອດໄພຂອງຖະໜົນຫົນທາງ, ລະບົບກ້ອງວົງຈອນ CCTV, ການແຈ້ງເຕືອນອັກຄີໄພ, ລວມໄປເຖິງການຈັດການລະບົບຂອງລັດຖະບານດິຈິຕອນ ແລະ ອື່ນໆ ເຊີ່ງເປັນຕົ້ນແບບທີ່ໜ້າສົນໃຈໃນການພັດທະນາໃນ ສປປ ລາວ ເຮົາໃນຕໍ່ໜ້າ