ໃນຕອນເຊົ້າຂອງວັນທີ 13 ພະຈິກ 2024 ທີ່ ຫ້ອງການ ຄະນະພົວພັນຕ່າງປະເທດສູນກາງພັກ ໄດ້ຈັດກອງປະຊຸມຄັ້ງປະຖົມມະລຶກເພື່ອຜັນຂະຫຍາຍເນື້ອໃນຂອບການຮ່ວມມືໃນບົດບັນທຶກຄວາມເຂົ້າໃຈ MOU ວ່າດ້ວຍການຮ່ວມມືໃນການຫັນວຽກງານຂອງຄະນະພົວພັນຕ່າງປະເທດສູນກາງພັກເປັນດິຈິຕອນ ລະຫວ່າງ ກະຊວງ ເຕັກໂນໂລຊີ ແລະ ການສື່ສານ(ກຕສ) ແລະ ຄະນະພົວພັນຕ່າງປະເທດສູນກາງພັກ (ຄຕພ) ຂື້ນຢ່າງເປັນທາງການໂດຍໃຫ້ກຽດເປັນປະທານກອງປະຊຸມໃນຄັ້ງນີ້ແມ່ນ ທ່ານ ປອ ທະວີສັກ ມະໂນທັມ ຫົວໜ້າສູນບໍລິຫານລັດດິຈິຕອນ, ກະຊວງ ຕສ ແລະ  ຄະນະປະທານຮ່ວມໂດຍ ແມ່ນ ທ່ານ ບຸນຍະເດດ ໄຊຍະວົງ ຫົວໜ້າຫ້ອງການ, ຄຕພ. ມີບັນດາຜູ້ຕາງໜ້າຄະນະກົມ, ຫ້ອງການ, ສະຖາບັນ, ສູນຂອງທັງສອງພາກສ່ວນເຂົ້າຮ່ວມຢ່າງພ້ອມພຽງລວມຈຳນວນ 15 ທ່ານ. ຍິງ 01 ທ່ານ

ໃນກອງປະຊຸມ ທ່ານ ບຸນຍະເດດ ໄຊຍະວົງ ຫົວໜ້າຫ້ອງການ ໃນນາມຕາງໜ້າຄະນະນຳຂອງ ຄຕພ ໄດ້ລາຍງານສະພາບການນໍາໃຊ້ ແລະ ການພັດທະນາໄອຊີທີ ເຂົ້າໃນວຽກງານ ໂດຍເພິ່ນໄດ້ຍົກໃຫ້ເຫັນເຖິງຄວາມສຳຄັນ ແລະ ສະພາບແວດລ້ອມຂອງການຫັນເປັນທັນສະໄໝຂອງຄະນະພົວພັນຕ່າງປະເທດສູນກາງພັກໃນໄລຍະຜ່ານມາ ພ້ອມກັບສະເໜີຄວາມຕ້ອງການຮີບດ່ວນໃນການຫັນເປັນທັນສະໄໝໂດຍສະເພາະໃນທ້າຍປີ 2024 ແມ່ນນໍາໃຊ້ບັນດາລະບົບຄື: ລະບົບຫ້ອງການທັນສະໄໝ, ລະບົບຖານຂໍ້ມູນພະນັກງານ ແລະ ປັບປຸງພັດທະນາເວັບໄຊຂອງ ຄຕພ ເເນໃສ່ເພື່ອຫັນເປັນດິຈິຕອນຂອງ ຄຕພ

ທ່ານ ປອ ທະວີສັກ ມະໂນທັມ ຫົວໜ້າ ສູນບໍລິຫານລັດດິຈິຕອນ, ໃນນາມຕາງໜ້າຄະນະຫັນເປັນດິຈິຕອນ ກຕສ ໄດ້ລາຍງານ ສະພາບການທີ່ພົ້ນເດັ່ນໃນການພັດທະນາວຽກງານເພື່ອຫັນເປັນທັນສະໄໝຂອງ ສ ປປ ລາວ  ຊື່ງໃນນັ້ນວຽກງານ ການບໍລິຫານ ແລະ ການບໍລິການລັດດິຈິຕອນ ມີທ່າກ້າວການພັດທະນາ ຢ່າງວ່ອງໄວ ເປັນຕົ້ນແມ່ນບັນດາ ລະບົບ ທີ່ເປັນພື້ນຖານໂຄງລ່າງໃນການຫັນເປັນທັນສະໄໝທີ່ກະຊວງ ຕສ ໄດ້ພັດທະນາຂື້ນເຊັ່ນວ່າ: ລະບົບກອງປະຊຸມທາງໄກ (VC), ລະບົບຫ້ອງການທັນສະໄໝ (e-Office), ລະບົບເວັບໄຊພາກລັດ (G-Web), ລະບົບສື່ສານພາກລັດ (G-Chat), ລະບົບຈັດເກັບ ແລະ ນຳໃຊ້ເອກະສານຮ່ວມກັນຂອງພາກລັດ (G-Share) ແລະ ອື່ນໆ.ໂດຍເລັງເຫັນເຖິງຄວາມສຳຄັນຢ່າງພາວະວິໃສຄືດັ່ງກ່າວ.  ຄະນະພັກຄະນະນໍາກະຊວງ ຕສ ໄດ້ສ້າງເອກະສານຝຶກອົບຮົມຄວາມຮູ້ພື້ນຖານກ່ຽວກັບການຫັນເປັນດິຈິຕອນຂື້ນ (ໃນນັ້ນປະກອບມີ 3 ເຫຼັ້ມ 15 ບົດຮຽນ) ເພື່ອເປັນການເຜີຍແຜ່ວຽກງານບົດບາດມະຫາພາກຂອງກະຊວງ ຕສ ແລະ ຄວາມພ້ອມຂອງການຫັນເປັນດິຈິຕອນໃນຕໍ່ໜ້າໃຫ້ແກ່ບັນດາກະຊວງ, ອົງການທຽບເທົ່າ, ບັນດາແຂວງໃນຂອບເຂດທົ່ວປະເທດໄດ້ຮັບຮູ້ ແລະ ເຂົ້າໃຈໄປໃນທິດທາງດຽວກັນ, ໃນກອງປະຊຸມຍັງໄດ້ມີຄໍາເຫັນແລກປ່ຽນກັບຂໍ້ສະເໜີທີ່ ຄຕພ ໄດ້ຍົກຂຶ້ນມາສົນທະນາ. ເຊິ່ງທັງ 2 ພາກສ່ວນຈະໄດ້ກະກຽມທີມງານເພື່ອເຮັດວຽກລົງເລີກດ້ານເຕັກນິກຮ່ວມກັນລະອຽດຕື່ມ

ຕະຫຼອດໄລຍະຂອງກອງປະຊຸມ, ບັນດາຜູ້ແທນກອງປະຊຸມທັງ 2 ພາກສ່ວນໄດ້ແລກປ່ຽນຄໍາຄິດຄໍາເຫັນກົງໄປກົງມາ ແລະ ມີຄໍາຖາມເຈາະຈິ້ມທີ່ເປັນຂະບວນຝົດຝື້ນ ແລະ ມີເນື້ອໃນອັນເປັນປະໂຫຍດຕໍ່ການປັບປຸງ ແລະ ພັດທະນາ ພື້ນຖານໂຄງລ່າງ ແລະ ລະບົບບໍລິຫານເພື່ອຫັນເປັນທັນສະໄໝຂອງ ຄຕພ ພາຍໃຕ້ຂອບການຮ່ວມມືໃນບົດບັນທຶກຄວາມເຂົ້າໃຈຮ່ວມກັນ.

ກອງປະຊຸມໄດ້ປິດລົງໃນເວລາ 11:30 ຂອງວັນດຽວກັນ.