ໃນຕອນບ່າຍ ຂອງວັນທີ 14 ພະຈິກ 2024, ສູນບໍລິຫານລັດດິຈິຕອນ, ກະຊວງ ເຕັກໂນໂລຊີ ແລະ ການສື່ສານ  ໄດ້ຈັດ ກອງປະຊຸມສໍາມະນາ ແລະ ສາທິດ ການທົດລອງນໍາໃຊ້ ລະບົບຢັ້ງຢືນຕົວຕົນດິຈິຕອນ ເພື່ອເສີມຂະຫຍາຍການບໍລິການພາກລັດ ໂດຍຜ່ານ ການຢັ້ງຢືນຕົວຕົນດິຈິຕອນ ທີ່ ໂຮງແຮມ ລາວພລາຊາ, ໂດຍການໃຫ້ກຽດເປັນປະທານຂອງ ທ່ານ ແກ້ວວິສຸກ ໂສລະພົມ ຮອງລັດຖະມົນຕີກະຊວງ ເຕັກໂນໂລຊີ ແລະ ການສື່ສານ, ມີຜູ້ຕາງໜ້າເຂົ້າຮ່ວມຈາກ ກະຊວງ ພາຍໃນ ແລະ ການສື່ສານ ປະເທດຍີ່ປຸ່ນ, ສະຖານທູດຍີ່ປຸ່ນ ປະຈໍາ ສປປ ລາວ,  ບໍລິສັດ Ryobi, ບໍລິສັດ NEC, ບໍລິສັດ xID ຂອງປະເທດຍີ່ປຸ່ນ, ບັນດາກົມ/ທຽບເທົ່າ ແລະ ບັນດາກະຊວງ ອ້ອມຂ້າງ ຈຳນວນຫຼາຍກວ່າ 45 ທ່ານ ທັງຮູບແບບເຊິ່ງໜ້າ ແລະ ອອນລາຍ 

ຈຸດປະສົງຂອງກອງປະຊຸມສຳມະນາຄັ້ງນີ້ ແມ່ນ ນຳສະເໜີ ແລະ ແລກປ່ຽນບົດຮຽນ ກ່ຽວກັບການນໍາໃຊ້ລະບົບຢັ້ງຢືນຕົວຕົນດິຈິຕອນ ຂອງແຕ່ລະປະເທດ ແລະ ທິດທາງການນຳໃຊ້ຢູ່ໃນ ສປປ ລາວ, ພ້ອມກັນນັ້ນ ຍັງມີການສາທິດ ການທົດລອງນຳໃຊ້ ການລົງທະບຽນລະບົບຢັ້ງຢືນຕົວຕົນດິຈິຕອນ ໂດຍນຳໃຊ້ເຕັກໂນໂລຊີຂອງປະເທດຍີ່ປຸ່ນ  

ກອງປະຊຸມດັ່ງກ່າວ, ທ່ານ ແກ້ວວິສຸກ ໂສລະພົມ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ມີຄໍາເຫັນບາງຕອນວ່າ: ການພັດທະນາລະບົບການຢັ້ງຢືນຕົວຕົນດິຈິຕອນ ຫຼື ວ່າ Digital ID ຖືເປັນປັດໄຈສໍາຄັນທີ່ຕ້ອງໄດ້ມີການວາງແຜນ ແລະ ຈັດຕັ້ງປະຕິບັດຢ່າງຮີບດ່ວນ ເພື່ອອໍານວຍຄວາມສະດວກໃຫ້ແກ່ບັນດາບໍລິສັດ, ປະຊາຊົນ ໃນການເຂົ້າເຖິງ ແລະ ນໍາໃຊ້ການບໍລິການຕ່າງໆຂອງພາກລັດ ແລະ ຂອງພາກເອກະຊົນ ທີ່ນັບມື້ນັບມີຄວາມຕ້ອງການຫຼາຍຂຶ້ນ. ສຳລັບການຢັ້ງຢືນຕົວຕົນດິຈິຕອນ ຢູ່ໃນ ສປປ ລາວ ກໍມີໜໍ່ແໜງການນຳໃຊ້ມາດົນພໍສົມຄວນ ເຊັ່ນ: ນໍາໃຊ້ບັນຊີຈົດໝາຍເອເລັກໂຕຣນິກ (e-mail) ຫຼື ສື່ສັງຄົມອອນລາຍ ເພື່ອສະໝັກນໍາໃຊ້ບໍລິການ ຫຼື ແອັບພລີເຄເຊິນຕ່າງໆຜ່ານອິນເຕີເນັດ ຫຼື ຢັ້ງຢືນຕົວຕົນ ໃນເວລາໃຊ້ແອັບຂອງທະນາຄານ ແຕ່ທັງໝົດນີ້ ແມ່ນການຢັ້ງຢືນຕົວຕົນແບບພື້ນຖານ ຫຼື ບໍ່ມີການພິສູດຂໍ້ມູນຕົວຕົນຈາກເຈົ້າໜ້າທີ່ເທື່ອ. ໃນອະນາຄົດ ການບໍລິການອອນລາຍເພີ່ມຂຶ້ນ ແນ່ນອນວ່າຈຳເປັນຕ້ອງມີການບໍລິການຢັ້ງຢືນຕົວຕົນທີ່ປອດໄພ ແລະ ເຊື່ອຖືໄດ້. ສະນັ້ນ, ການຮ່ວມມືໃນໂຄງການນີ້ ຈຶ່ງຈໍາເປັນຫຼາຍ ແລະ ສອດຄ່ອງກັບແນວທາງຂອງພັກ-ລັດ ໃນການຫັນເປັນດິຈິຕອນ ທັງ 3 ເສົາຄຳ້

ໃນກອງປະຊຸມສຳມະນານີ້ ໄດ້ມີການນຳສະເໜີໃນຫຼາຍຫົວຂໍ້ກ່ຽວກັບການຢັ້ງຢືນຕົວຕົນດິຈິຕອນ ເປັນຕົ້ນ ຫົວຂໍ້ ຄວາມຈຳເປັນລະບົບ ຢັ້ງຢືນຕົວຕົນດິຈິຕອນ ສຳລັບການບໍລິການພາກລັດຂອງ ສປປ ລາວ.  ການນໍາໃຊ້ລະບົບຢັ້ງຢືນຕົວຕົນດິຈິຕອນ ຂອງປະເທດຍີ່ປຸ່ນ ແລະ ບົດຮຽນຈາກປະເທດຕ່າງໆ,  ພ້ອມກັນນັ້ນ ໄດ້ສາທິດ ການລົງທະບຽນໃນລະບົບຕົວຈິງ. ຫຼັງຈາກນັ້ນ ໄດ້ເປີດເວລາໃຫ້ແຕ່ລະພາກສ່ວນ ແລກປ່ຽນສົນທະນາແຜນພັດທະນາການບໍລິການຂອງແຕ່ລະຂະແໜງການ ທີ່ຈະມີການນຳໃຊ້ລະບົບຢັ້ງຢືນຕົວຕົນດິຈິຕອນ

ກິດຈະກຳການສາທິດ ກ່ຽວກັບລະບົບຢັ້ງຢືນຕົວຕົນດິຈິຕອນໃນຄັ້ງນີ້ ແມ່ນການຮ່ວມມືໄລຍະທີ 2 ລະຫວ່າງ ກະຊວງ ເຕັກໂນໂລຊີ ແລະ ການສື່ສານ ກັບ ກະຊວງ ພາຍໃນ ແລະ ການສື່ສານ ປະເທດຍີ່ປຸ່ນ ໂດຍຜ່ານ ບໍລິສັດຄູ່ຮ່ວມຈາກປະເທດຍີ່ປຸ່ນ ( ບໍລິສັດ Ryobi System, NEC, J&C, Ryobi Lao) ເພື່ອສຶກສາແຜນພັດທະນາລະບົບຢັ້ງຢືນຕົວຕົນດິຈິຕອນ ສຳລັບ ສປປ ລາວ ຊຶ່ງໄລຍະທີ 1 ແມ່ນການເກັບກຳຂໍ້ມູນກັບບັນດາພາກສ່ວນຕ່າງໆ ແລະ ສ້າງບົດລາຍງານ. ການສາທິດ ລົງທະບຽນໃນຄັ້ງນີ້ ແມ່ນຈະຈັດຕັ້ງປະຕິບັດໃນຮູບແບບ ລົງໄປສະຖານທີ່ຕ່າງໆໃນຂອບເຂດນະຄອນຫຼວງວຽງຈັນ  ເພື່ອໃຫ້ປະຊາຊົນ ທົດລອງ ລົງທະບຽນເຂົ້າໃນລະບົບຕົວຈິງ ຊຶ່ງຄາດຄະເນ ຈະໃຊ້ເວລາຮອດເດືອນ 12 ປີ 2024